O pavillón Daniel Cordido Castro de Lugo acollía o pasado domingo, 13 de novembro, a Segunda Sede da Liga Galega de Hockey Liña en categoría Masculina, cos partidos correspondentes ás xornadas tres e catro. Foi un día moi intenso e o público do polideportivo do barrio da Piringalla non tivo tempo de aburrirse, xa que durante toda a xornada dominical houbo partidos de grande nivel nos que os equipos, moito máis rodados que na Primeira Sede, puxeron dende o primeiro momento toda a carne no asador.
Cumpriron os equipos da parte alta da táboa e tanto Lóstregos coma CPL Brigantium Arteixo e CHL Cabuxos venceron nos seus partidos, polo que seguen liderando a clasificación con doce puntos e contando os seus catro encontros disputados por vitorias, aínda que a clasificación vén marcada pola diferenza de goles, co Lóstregos como líder provisional seguido por Cabuxos e Brigantium.
Coma partidos máis destacados sinalamos os dous derbis lucenses que se xogaron sobre a pista da Piringalla e que enfrontaron ó Lóstregos Máster e Cabuxos (5-8) e a Lóstregos contra Lóstregos Máster (4-2).
A Terceira Sede celebrarase o 4 de decembro na Coruña, onde se disputarán as xornadas cinco e seis.