Palacio dos Deportes de Riazor – A Coruña | 15 de xullo de 2018
O segundo día de competición, o único xunto ao de onte no que non se disputarán cinco partidos, comezaba ás dúas e media da tarde co segundo encontro do grupo A entre Alemaña e Holanda, que finalizaba cun resultado de 5-1 favorable aos alemáns, o mesmo que se daba entre Suiza e Austria con triunfo para os helvéticos. Os outros dous partidos desta xornada resolvíanse sen sorpresas por parte de dúas das seleccións nacionais favoritas ao título xunto a España como son Italia e Portugal.
Así, os italianos de Massimo Mariotti vencían por un contundente 0-24 ante unha débil Bélxica que, aínda que puxo moito tesón, non puido evitar a goleada. No caso dos portugueses dirixidos por Luís Sénica, tampouco tiveron ningún problema para derrotar a Andorra por un cómodo 0-11.
Disputada esta segunda xornada do 53 Campionato de Europa Masculino de Hóckey Patíns, xa se estrearon todos os equipos na competición excepto Francia, que o fará mañá ante Andorra e na cal, a priori, tanto Italia como España e Portugal teñen de novo partidos que deberían resolver con facilidade.
Os horarios e partidos do terceiro día este luns son os seguintes:
12:00 | Bélxica – Alemaña
14:30 | Francia – Andorra
17:00 | Italia – Inglaterra
19:00 | Holanda – España
22:00 | Portugal – Suiza
