Esta pasada fin de semana concluía a Liga Galega Sénior Masculina de Hóckey sobre Patíns que contou coa participación de doce equipos e que se veu desenvolvendo desde o 21 de setembro de 2018 ata o 10 de febreiro de 2019. Logo de 22 xornadas, Club A. A. Dominicos “A” era o campión con 21 vitorias e so unha derrota, o que lle permitiu acadar o título con varias xornadas de antelación antes do remate da competición.
Ademais, esta tempada o remate da mesma vén con un premio adicional, pois os tres primeiros clasificados disputarán o Grupo Norte da Liga OK Bronce que se disputará por primeira vez e na que xogarán conxuntos galegos, asturianos, vascos e navarros. Xunto a Dominicos, tamén estarán representando a Galicia o Club Compañía de María “A” como segundo clasificado e Escola Lubiáns, que acadaba a súa clasificación na derradeira xornada da Liga Galega.
A Liga OK Bronce comezará o 23 de febreiro e contará con 14 xornadas que rematarán o 9 de xuño.
[Foto: GaliciaNhockey]
#eupatino