Lucas Yáñez proclamouse Campión de Europa da modalidade de Libre en categoría sénior masculina tras acadar onte unha puntuación de 239.39 no Campionato Europeo que se está a celebrar en Trieste, Italia.
O patinador do CPA Maxia, xa tiña o primeiro posto provisional, logo de quedar o primeiro no seu programa curto o pasado sábado.
Pola súa banda, David Rama (júnior) e Olivia Rey (xuvenil), ambos do CPA Maxia, remataron a competición en 4º e 6º lugar respectivamente.
Aínda queda moita competición por diante: Marta e Adrián Blanco (CPA Maxia) rematan hoxe na modalidade de parellas de artístico, o venres será a quenda de Iago Vázquez (CD Fervello) na modalidade de Solo Danza Cadete, e o sábado competirá Joel Ribeiro (CPA Gondomar) na modalidade de Solo Danza Júnior.
Desde a FGP queremos darlles os parabéns polo seu gran traballo, esforzo e magníficos resultados, e tamén queremos desexar moita sorte aos patinadores e patinadoras que seguen na competición.
Fotos: Raniero Corbelletti Photographie