Palacio dos Deportes de Riazor – A Coruña | 17 de xullo de 2018
A cuarta xornada do 53 Campionato de Europa Masculino de Hóckey Patíns comezaba con Inglaterra enfrontándose á débil Bélxica nun partido do grupo B, volvendo levar os belgas outra goleada aínda que nesta ocasión lograban marcar os seus dous primeiros tantos na competición para un resultado final de 14-2. O outro encontro matinal, correspondente ao grupo A, enfrontaba a Austria e a Francia, comezando ambos cun gran acerto ofensivo pois en apenas catro minutos se marcaban catro goles, 1-3 para os galos, que aínda que tardaron en coller ritmo e ver porta con facilidade, terminaba cun claro 3-14 ao seu favor con todos os seus xogadores de pista logrando algún tanto.
Tres partidos agardaban para a tarde cun igualado Suiza-Andorra do grupo A para abrir a sesión vespertina. Os helvéticos poñíanse por diante no primeiro minuto e remataba o primeiro periodo. Tralo descanso chegaban o resto de goles ao comezo do segundo tempo pois Andorra empataba, pero Suiza volvía marcar un minuto despois ata que os do Principado lle volvían dar a volta ao encontro, logrando así a súa primeira vitoria neste Eurohockey2018.
O seguinte era o que enfrontaba a España con Alemaña do grupo B, a priori o máis complicado dos disputados ata o momento para a selección anfitriona. No entanto e aínda que os alemáns comezaron con moita firmeza, aos poucos fóronse diluíndo cos de Alejandro Domínguez situándose cada vez mellor na pista para sentenciar o partido xa no primeiro periodo, que finalizaba cun cinco a un favorable aos españois. Dous tantos máis no segundo tempo deixaban o definitivo 7-1.
No derradeiro partido da xornada, correspondente ao grupo B, Holanda deu máis traballo do previsto a Italia no primeiro periodo, xa que os de Massimo Mariotti só gañaban por 1-4 e ata ao comezo do segundo tempo os holandeses se chegaban e a situar 2-4. A partir de aí, Italia apretou un pouco e xa puxo o partido claramente ao seu favor para concluír cun rotundo 4-15.
O grupo A segue encabezado por unha sólida Portugal, que hoxe tivo xornada de descanso, seguida por Francia, ambas invictas, pero os galos cun partido menos. No B, Italia e España manteñen o pulso para terminar primeiros e evitar, previsiblemente, a Portugal nunha hipotética semifinal.
Os horarios e partidos do quinto día de competición, mañá mércores, son os seguintes:
10:00 | Francia – Suiza
12:30 | Inglaterra – Holanda
17:30 | Italia – Alemaña
20:00 | Bélxica – España
22:00 | Austria – Portugal