No pavillón de Elviñá II da Coruña disputábanse esta mañá os catro encontros de cuartos de final da segunda edición da Copa Federación Senior Masculina de Hóckey sobre Patíns. A primeira semifinal ía sair das dúas primeiras eliminatorias, onde o Escola Lubiáns derrotaba nun emocionante encontro a Club Compañía de María “B”. Na segunda, enfrontábanse AC Órdenes e CH Compostela, terceiro e cuarto clasificado ao remate da primeira volta da liga regular, que tamén estivo moi igualada ata que os de Ordes sentenciaban nos derradeiros minutos.
O partido máis interesante a priori era o que xogaban os dous primeiros clasificados, pois así o deparaba o sorteo previo, sendo a vitoria para o Club AA Dominicos ante o Club Compañía de María “A”, os dous finalistas da pasada edición, nun encontro moi igualado ata que nos minutos finais se decantaba a favor dos vixentes campións. No derradeiro partido de cuartos de final, cómodo triunfo do HC Liceo contra Traviesas HC, quedando así definidos os emparellamentos das semifinais que se disputaron esta tarde.
Na primeira o AC Órdenes eliminaba nun emocionante e disputado partido ao Escola Lubiáns de Carballo, que ademais se decidía cun gol de ouro na prórroga a favor dos ordenses. Máis doada foi a vitoria do HC Liceo ante o Club AA Dominicos, que chegaba como favorito ao rematar a primeira volta da liga regular como líder e sendo tamén o vixente campión da Copa Federación, pero que caía sorprendentemente ante os liceístas. Mañá a final (10:30 horas) poderá seguirse minuto a minuto na acta electrónica.
[Foto: AC Órdenes]
II COPA FEDERACIÓN
Sábado, 3 de decembro de 2016
Cuartos de final
9:00 Club Compañía de María “B” 5 – 6 Escola Lubiáns
10:30 AC Órdenes 6 – 4 CH Compostela
12:00 Club Compañía de María “A” 2 – 5 Club AA Dominicos
13:30 Traviesas HC 0 – 8 HC Liceo
Semifinais
18:30 Escola Lubiáns 4 – 5 AC Órdenes
20:00 Club AA Dominicos 1 – 5 HC Liceo
Domingo, 4 de decembro de 2016
Final
10:30 AC Órdenes – HC Liceo